ക്യാന്സര് രോഗത്തെ അതിജീവിച്ചവരുടെ കൂട്ടത്തിൽ എടുത്തുപറയേണ്ട ഒരു പേരാണ് നടി മനീഷ കൊയ്രാളയുടേത്. 2012ലാണ് മനീഷയ്ക്ക് അണ്ഡാശയ ക്യാന്സറാണെന്ന് സ്ഥിരീകരിക്കപ്പെട്ടത്. രോഗം പൂര്ണ്ണമായി ഭേദമായ മനീഷ പിന്നീടിങ്ങോട്ട് ജീവിതത്തിന്റെ പ്രാധാന്യത്തെ കുറിച്ചും, ശരീരത്തിന്റേയും മനസിന്റേയും ആരോഗ്യം കാത്തുസൂക്ഷിക്കുന്നതിനെ കുറിച്ചുമെല്ലാം ആരാധകരുമായി പങ്കുവെച്ചു.
യാത്രകളുടെ ചിത്രങ്ങളും ‘പൊസിറ്റീവ്’ ആയി നിലനില്ക്കാന് ആവശ്യമായ പ്രചോദനങ്ങളാണ് മനീഷയുടെ ഇൻസ്റ്റാഗ്രാം പോസ്റ്റുകളില്ലെല്ലാം. കഴിഞ്ഞ ദിവസവും അത്തരത്തിലുള്ള ചില ചിത്രങ്ങളും വീഡിയോകളും മനീഷ ഇന്സ്റ്റഗ്രാമിലൂടെ പങ്കുവച്ചിരുന്നു. കവി റോബര്ട്ട് ഫ്രോസ്റ്റിന്റെ ‘മൈല്സ് ടു ഗോ ബിഫോര് ഐ സ്ലീപ്…’ എന്ന പ്രശസ്തമായ വരികള് ഉള്ക്കൊള്ളിച്ചാണ് കാട്ടിലേക്കുള്ള യാത്രയുടെ വിശേഷങ്ങള് മനീഷ പങ്കുവച്ചിരിക്കുന്നത്.
കാട്ടിലേക്കുള്ള വഴിയും, അതിലൂടെയുള്ള ശാന്തമായ യാത്രയുമാണ് ചിത്രങ്ങളിലും വീഡിയോയിലുള്ളത്. പല വേദികളിലും പ്രചോദനപരമായ സംഭാഷണങ്ങളും ചര്ച്ചകളും നടത്തുന്നതിനും മനീഷ ക്ഷണിക്കപ്പെട്ടിരുന്നു. ക്യാന്സര് അതിജീവനത്തിന് ശേഷം ആ അനുഭവങ്ങള് കോര്ത്തിണക്കിക്കൊണ്ട് എഴുതിയ ‘ഹീല്ഡ്’ എന്ന മനീഷയുടെ പുസ്തകവും ഏറെ ശ്രദ്ധിക്കപ്പെട്ടിരുന്നു.