രണ്ടുപതിറ്റാണ്ടിനു ശേഷം, പണ്ട് താന് ഭിക്ഷാടന മാഫിയയുടെ കയ്യില് നിന്നും രക്ഷിച്ച കുരുന്നു പെണ്കുട്ടിയെ കാണാന് സുരേഷ് ഗോപി ആലത്തൂരിലേക്ക് എത്തി. പ്രസവിച്ചയുടന് അമ്മ തെരുവില് ഉപേക്ഷിക്കുകയും പിന്നീട് ശരീരമാസകലം പൊള്ളലുകളോടെ ആലുവയിലെ ജനസേവാ ശിശുഭവനില് എത്തുകയും ചെയ്ത ശ്രീദേവിയെതേടിയാണ് സുരേഷ് ഗോപി വീട്ടിലെത്തിയത്.
വികാര നിര്ഭരമായിരുന്നു വര്ഷങ്ങള്ക്ക് ശേഷമുള്ള ആ കൂടിക്കാഴ്ച, താന് ദൈവത്തെ പോലെ കാണുന്ന താരം തന്റെ മറ്റൊരു ബുദ്ധിമുട്ടറിഞ്ഞതും വീണ്ടും കരുതലായ്, സ്നേഹമായ് അരികിലേക്ക് എത്തി, അതിരുകള്ക്കുമപ്പുറം ആയിരുന്നു അവളുടെ സന്തോഷം. അന്നുകണ്ട നിന്റെ മുഖം ഇപ്പോഴും ഓര്മയുണ്ട് മകളേ” -സുരേഷ് ഗോപി പറഞ്ഞപ്പോള് ഓര്മകളുടെ തിരതള്ളലില് ശ്രീദേവി വിതുമ്പിക്കൊണ്ട് ആ നെഞ്ചോടുചേര്ന്നു.
ഒരുനിമിഷം അവര് അച്ഛനും മകളുമായി. പൊതിഞ്ഞുകൊണ്ടുവന്ന പലഹാരങ്ങള് അവള്ക്ക് നല്കി. 25 വര്ഷംമുമ്പ് മലപ്പുറം കോട്ടയ്ക്കല് പൂക്കിപ്പറമ്പിലെ കടത്തിണ്ണയില് ഉറുമ്പരിച്ച് കൈകാലിട്ടടിച്ചുകരഞ്ഞ ചോരക്കുഞ്ഞായിരുന്നു അവള്. കോഴിച്ചന്ന കണ്ടംതിറയിലെ നാടോടിയായ തങ്കമ്മ എന്ന എണ്പതുകാരി അന്ന് മകളായി ഏറ്റെടുത്തു. പുറമ്പോക്കിലെ കുടിലില് പ്രസവിച്ചുകിടന്നിരുന്ന തങ്കമ്മയുടെ മകള് വേട്ടക്കാരി അവളെയും മുലയൂട്ടി.
തങ്കമ്മ ആക്രിപെറുക്കിയും നാട്ടുകാരുടെ സഹായംകൊണ്ടും ശ്രീദേവിയെ വളര്ത്തി. നാടോടികള്ക്കൊപ്പം വളരുന്ന സുന്ദരിക്കുട്ടി മാധ്യമങ്ങളില് വാര്ത്തയായി. കോഴിച്ചന്ന എ.എം.എല്.പി. സ്കൂളില് ശ്രീദേവിയെ ചേര്ത്തപ്പോള് തങ്കമ്മയെ ഒരു ചിന്ത അലട്ടി. തന്റെ കാലശേഷം ഇവളെ ആര് സംരക്ഷിക്കും. ഭിക്ഷാടനവും ആക്രിശേഖരണവും നടത്തുന്ന നാടോടിക്കൂട്ടത്തിലെ ചിലര് ശ്രീദേവിയെ ഉപദ്രവിച്ചുതുടങ്ങിയതും ഈ ആശങ്കയ്ക്ക് കാരണമായി.
നടന് ശ്രീരാമനില്നിന്ന് ഇക്കഥകള് കേട്ടറിഞ്ഞ സുരേഷ് ഗോപി വീടുവെച്ച് കൊടുക്കാന് ശ്രമംനടത്തിയെങ്കിലും അത് ഫലപ്രാപ്തിയിലെത്തിയില്ല. തുടർന്ന് മമ്മൂട്ടി ഫാന്സ് അസോസിയേഷന് അവളെ ആലുവയില് ജോസ് മാവേലി നടത്തുന്ന ജനസേവാ ശിശുഭവന്റെ സംരക്ഷണയിലാക്കുകയായിരുന്നു.
ഫാന്സി സ്റ്റോര് നടത്തുന്ന സതീഷാണ് ശ്രീദേവിയുടെ ഭര്ത്താവ്. ശിവാനി മകളാണ്. ഫാന്സി സ്റ്റോറിന് പിറകിലെ കുടുസുമുറിയിലാണ് കുടുംബം കഴിയുന്നത്. തന്റെ ജീവിത പ്രയാസങ്ങളെ കുറിച്ച് ശ്രീദേവി സുരേഷ് ഗോപിയോട് വിവരിച്ചു. ജീവിത പ്രയാസങ്ങളെ അതിജീവിക്കാനുള്ള എല്ലാ പിന്തുണയും നല്കിയാണ് സുരേഷ് ഗോപി ശ്രീദേവിക്കരുകില് നിന്ന് മടങ്ങിയത്.