ജോര്ജ് ഫ്ലോയിഡിന്റെ കൊലപാതകത്തിന് പിന്നാലെ അമേരിക്കയില് വര്ണ വിവേചനത്തിനെതിരെ ശക്തമായ പ്രതിഷേധമാണ് അരങ്ങേറുന്നത്. വെെറ്റ് ഹൗസിനെ അടക്കം വിറപ്പിച്ച പ്രതിഷേധങ്ങള് പിന്തുണയുമായി ലോകമെമ്പാടുമുള്ള സമത്വവിശ്വാസികള് രംഗത്ത് എത്തിയിട്ടുണ്ട്. സിനിമാ ലോകത്തു നിന്നുമുള്ളവരും തങ്ങളുടെ പിന്തുണ അറിയിച്ചു കൊണ്ട് എത്തിയിട്ടുണ്ട്.
ഈ സാഹചര്യത്തില് ഇന്ത്യയില് വച്ചു കുട്ടിക്കാലത്ത് തനിക്കുണ്ടായ അനുഭവത്തെ കുറിച്ച് തുറന്നു പറയുകയാണ് നടി മാളവിക മോഹനന്. ഇരുണ്ട നിറത്തിന്റെ പേരില് സുഹൃത്തിന്റെ അമ്മയില് നിന്നുമുണ്ടായ പ്രതികരണമാണ് താരം വെളിപ്പെടുത്തുന്നത്. ഇന്സ്റ്റഗ്രാമിലെ പോസ്റ്റിലൂടെയായിരുന്നു മാളവിക മനസ് തുറന്നത്.
‘എനിക്ക് 14 വയസുള്ളപ്പോള് എന്റെ അടുത്ത സുഹൃത്തുക്കളിലൊരാള് പറഞ്ഞു അവന്റെ അമ്മ അവന് ചായ കൊടുക്കാറില്ലെന്ന്. ചായ കുടിച്ചാല് കറുത്തു പോകുമെന്നായിരുന്നു അവര് കരുതിയിരുന്നത്. ഒരിക്കല് അവന് ചായ ചോദിച്ചപ്പോള് എന്നെ ചൂണ്ടി ചായ കുടിച്ചാല് അവളെ പോലെ കറുത്തു പോകുമെന്ന് പറഞ്ഞു. അവനൊരു വെളുത്ത മഹാരാഷ്ട്രക്കാരന് പയ്യനായിരുന്നു. ഞാന് ഇരുണ്ട നിറമുള്ള മലയാളിപെണ്കുട്ടിയും’ മാളവിക പറയുന്നു.
തങ്ങള്ക്കിടയിലെ നിറ വ്യത്യാസം അതുവരേയും തനിക്കൊരു പ്രശ്നമായി തോന്നിയിരുന്നില്ലെന്നും പക്ഷെ തന്റെ നിറത്തെ കുറിച്ച് ആദ്യമായി ഒരാള് അങ്ങനെ പറഞ്ഞതോടെ താനും അതേക്കുറിച്ച് ചിന്തിക്കാന് തുടങ്ങിയെന്ന് മാളവിക പറയുന്നു.
ജാതീയതയും വര്ണവിവേചനവും നമ്മുടെ സമൂഹത്തില് ഇപ്പോഴുമുണ്ട്. ഇരുണ്ട നിറമുള്ളവരെ കാലാ എന്ന് അഭിസംബോധന ചെയ്യുന്നത് എപ്പോഴും കേള്ക്കാമെന്നും താരം പറയുന്നു. ഉത്തരേന്ത്യക്കാരും ദക്ഷിണേന്ത്യക്കാരും തമ്മിലുള്ള ഈ വര്ണവിവേചനം ഭീകരമാണെന്നും താരം വ്യക്തമാക്കി.
ഇരുണ്ട നിറമുള്ളവരെ മദ്രാസികള് എന്നാണ് ഉത്തരേന്ത്യക്കാര് പൊതുവെ വിളിക്കുന്നത്. എന്തുകൊണ്ടാണ് ദക്ഷിണേന്ത്യക്കാരെ അങ്ങനെ വിളിക്കുന്നതെന്ന് അറിയില്ല. ഉത്തരേന്ത്യക്കാര് വെളുത്തവരും സുന്ദരന്മാരും ദക്ഷിണേന്ത്യക്കാര് കറുത്തവരും വിരൂപരുമാണെന്ന ധാരണ ഇപ്പോഴുമുണ്ടെന്ന് മാളവിക പറയുന്നു.
വടക്കുകിഴക്കന് സംസ്ഥാനങ്ങളില് നിന്നുമുള്ളവരെ ചിന്കി എന്നു വിളിക്കുന്നുവെന്നും കറുത്തവരെയെല്ലാം നീഗ്രോ എന്നു വിളിക്കുന്നുവെന്നും താരം പറയുന്നു. ലോകത്തുള്ള വര്ണവിവേചനത്തെ കുറിച്ച് പറയുമ്പോള് നമുക്ക് ചുറ്റുമുള്ളതിനെ കുറിച്ചും അറിഞ്ഞിരിക്കണമെന്നും മാളവിക അഭിപ്രായപ്പെട്ടു. നമ്മുടെ വീടുകളിലും സമൂഹത്തിലും സൗഹൃദ വൃന്ദങ്ങളിലുമുള്ള വിവേചനത്തെ കുറിച്ച് ചര്ച്ച വേണമെന്നും അവര് പറഞ്ഞു. നിറമല്ല ഒരു മനുഷ്യനെ സുന്ദരനാക്കുന്നത് മറിച്ച് അവന്റെ ഉള്ളിലെ നന്മയാണെന്നും മാളവിക കൂട്ടിച്ചേര്ത്തു.