കഴിഞ്ഞ കുറച്ചു കാലമായി മലയാള സിനിമാ താരങ്ങളില് മിക്കവരും ഫിറ്റ്നസില് ശ്രദ്ധിക്കുന്നത് അല്പ്പം കൂടിയിട്ടുണ്ട്. അക്കൂട്ടത്തിലൊരാളാണ് നടന് കുഞ്ചാക്കോ ബോബന്. ഇപ്പോഴിതാ തന്റെ വര്ക്കൗട്ട് വീഡിയോ പങ്കുവച്ചിരിക്കുകയാണ് മലയാളികളുടെ ചാക്കോച്ചന്. ഒപ്പം പത്ത് വര്ഷത്തോളം തന്നെ അലട്ടിയ ഷോള്ഡര് വേദനയേയും കുറിച്ചും അദ്ദേഹം തുറന്നു പറയുന്നു.
ഈ വീഡിയോ നിങ്ങൾക്ക് ഒരു സാക്ഷ്യമായി എടുക്കാം. അല്ലെങ്കിൽ, എന്റെ ദീർഘനാളായുള്ള സ്വപ്നം സാക്ഷാത്കരിക്കപ്പെട്ടതിന്റെ സന്തോഷം ഞാൻ പങ്കുവയ്ക്കുകയാണെന്ന് കരുതാം. ഏകദേശം കഴിഞ്ഞ പത്ത് വർഷത്തോളമായി എന്റെ ഷോൾഡറുകൾക്ക് ചില ഗുരുതരമായ പ്രശ്നങ്ങളുണ്ടായിരുന്നു, പ്രത്യേകിച്ച് വലത് ഷോൾഡറിന്. ലിഗ്മെന്റുമായി ബന്ധപ്പെട്ട പ്രശ്നം എന്നെ അലട്ടിയിരുന്നു. നിശ്ചിത ഉയരത്തിൽ എനിക്ക് കൈകൾ ഉയർത്താൻ പോലും സാധിക്കാത്ത അവസ്ഥയുണ്ടായിരുന്നു.
വലത് കൈ ഉയർത്തണമെങ്കിൽ എന്റെ ഇടതു കൈ കൊണ്ട് താങ്ങി പിടിക്കേണ്ടി വന്ന അവസ്ഥ. ബാഡ്മിന്റൺ കളിക്കാനോ ക്രിക്കറ്റ് കളിക്കാനോ എനിക്ക് സാധിച്ചിരുന്നില്ല.. സിനിമയിലെ പാട്ട് രംഗങ്ങളിൽ എന്റെ സുന്ദരികളായ നായികമാരെ എടുത്തുപൊക്കാൻ പോലും സാധിക്കാതിരുന്ന അത്ര മോശം അവസ്ഥ! തമാശകൾക്ക് അപ്പുറം പറയുകയാണെങ്കില്, ഒരു പുഷ് അപ് പോലും എടുക്കാൻ എന്നെക്കൊണ്ട് ഈ വർഷങ്ങളിൽ സാധിച്ചിരുന്നില്ല.
അനാവശ്യ മരുന്നുകളോ അനാവശ്യ നിർദേശങ്ങളോ നൽകാതെ എനിക്ക് ആവശ്യമുള്ള സമയത്തെല്ലാം ഒപ്പം നിന്നതിന് എന്റെ ഓർത്തോ ഡോ.മാമൻ അലക്സാണ്ടറിനോട് ഞാൻ നന്ദി പറയുന്നു, സൗഖ്യപ്പെടുത്തുന്ന മാന്ത്രിക സ്പര്ശമുള്ള മനുഷ്യനാണ് അദ്ദേഹം. എന്റെ ജിം ട്രെയിനർ ഷൈജന് അഗസ്റ്റിനോടും പ്രത്യേകം നന്ദി പറയുന്നു. എന്റെ സ്വപ്നങ്ങൾ നേടിയെടുക്കാൻ പിന്തുണച്ചതും എനിക്ക് എന്നിൽ വിശ്വാസമുണ്ടാകാൻ സഹായിച്ചതും അദ്ദേഹമാണ്. ജിമ്മില് താല്പര്യമുള്ള വ്യക്തിയല്ല ഞാന്. ആരോഗ്യപരമായ ദിനചര്യകൾ പോലും എന്നെ മുഷിപ്പിക്കാറുണ്ട്.
എന്നാൽ, അദ്ദേഹം എന്നെ പ്രോത്സാഹിപ്പിച്ചും ധൈര്യം നൽകിയും കൂടെ നിന്നു. എന്നിൽ ഇത്രത്തോളം മാറ്റങ്ങൾ കൊണ്ടുവരാൻ വെറും രണ്ട് മാസമാണ് അദ്ദേഹത്തിന് വേണ്ടി വന്നത്. ഈ വീഡിയോ കാണുന്ന ചിലര്ക്ക് എല്ലാം ലളിതമാണെന്ന് തോന്നുമെങ്കിലും, ഞാൻ അനുഭവിച്ച ഒരു കുട്ടിയുടേതുപോലുള്ള സന്തോഷം പറഞ്ഞറിയിക്കാൻ സാധിക്കാത്തതാണ്. അത് ആർക്കെങ്കിലും എന്തെങ്കിലും പ്രയോജനകരമാണെങ്കിൽ, ഞാൻ വളരെ സംതൃപ്തനാണ്.